Mesira
|
Descripziun |
|---|---|
Aboliziun da privilegis fiscals chantunals |
Sin plaun federal pajan las societads cun status spezial (p.ex. societads administrativas) sco fin ussa la taglia sin il gudogn cumplaina. Sin plaun chantunal n'han ellas pajà fin ussa nagina taglia sin il gudogn u han pajà mo ina taglia sin il gudogn reducida. Cun il project vegn abolida questa privilegisaziun fiscala. Ina regulaziun transitorica a temp limità mitigescha las consequenzas da questa aboliziun. |
Chascha da patentas («patentbox») |
Il gudogn che deriva da patentas e da dretgs cumparegliabels vegn suttamess sin plaun chantunal ad ina taglia reducida. Ma ils chantuns ston imponer ina taglia d'almain 10 pertschient sin quest gudogn. |
Deducziuns supplementaras per la perscrutaziun e per il svilup |
Per promover la perscrutaziun ed il svilup pon ils chantuns valitar pli ferm las expensas da perscrutaziun e da svilup. Permessa maximalmain è ina deducziun dad 1,5 giadas. |
Deducziun per l'atgna finanziaziun |
Ils chantuns pon permetter ina deducziun da tschains sin l'agen chapital, sche la grevezza fiscala effectiva sin il gudogn tras la Confederaziun, tras il chantun e tras la vischnanca importa almain 18,03 pertschient en la chapitala chantunala. |
Distgargia limitada |
La distgargia fiscala pervia da la chascha da patentas, pervia da las deducziuns supplementaras per la perscrutaziun e per il svilup e pervia da la deducziun per l'atgna finanziaziun na dastga betg importar dapli che 70 pertschient. Sche la pratica chantunala prevesa ina regulaziun transitorica per societads cun status spezial, vegnan resguardadas er las amortisaziuns correspundentas per la distgargia limitada. |
Adattaziuns tar la taglia sin il chapital |
Per la calculaziun da la taglia sin il chapital pon ils chantuns conceder ina reducziun sin l'agen chapital che fa part da participaziuns, da patentas e da dretgs cumparegliabels sco er d'emprests entaifer il concern. |
Decleraziun da reservas zuppadas |
Interpresas che transfereschan lur sedia en Svizra pon profitar d'amortisaziuns supplementaras durant ils emprims onns. Sche interpresas transfereschan lur sedia a l'exteriur, ston ellas pajar – sco gia oz – ina taglia da partenza. |
Extensiun da la fixaziun pauschala da taglia |
La fixaziun pauschala da taglia impedescha imposiziuns dublas da taglia sin plaun internaziunal. Da nov duain er filialas svizras d'interpresas estras avair il dretg d'ina tala fixaziun pauschala. |
Mesira
|
Descripziun |
|---|---|
Augment da l'imposiziun da dividendas |
En cas da la taglia sin las entradas ston las acziunarias ed ils acziunaris pajar da nov ina taglia da 70 pertschient tar la Confederaziun e d'almain 50 pertschient tar ils chantuns sin ils retgavs or da participaziuns. Questa imposiziun da taglia importa oz tar la Confederaziun 60 pertschient per la facultad privata e 50 pertschient per la facultad da fatschenta, en quatter chantuns sa chatta ella sut 50 pertschient. La premissa per questa imposiziun da taglia reducida resta la medema: I dovra ina participaziun d'almain 10 pertschient vi dal chapital d'ina interpresa. |
Limitaziuns tar il princip da l'apport da chapital |
Interpresas ch'èn quotadas a bursas svizras dastgan restituir a las acziunarias ed als acziunaris reservas d'apports da chapital mo pli en moda libra da taglias, sch'ellas pajan almain en la medema dimensiun dividendas suttamessas a la taglia. Sche talas interpresas cumpran enavos atgnas aczias, ston ellas destruir almain en la medema dimensiun reservas d'apports da chapital sco quai ch'ellas destrueschan reservas dal gudogn. |
Adattaziuns tar la transponaziun |
Il gudogn da la vendita d'aczias resta da princip liber da taglias. La nova regulaziun abolescha questa liberaziun da taglia però cumplettamain, sch'ina persuna venda aczias ad ina societad che vegn controllada d'ella. |
Mesira
|
Descripziun |
|---|---|
Cumpensaziun tranter la Confederaziun ed ils chantuns |
La quota chantunala vi da las entradas da la taglia federala directa vegn auzada da 17,0 pertschient a 21,2 pertschient. Tenor il stadi actual da las entradas survegnan ils chantuns supplementarmain var 1 milliarda francs per onn.[1] |
Clausula per las vischnancas |
Ils chantuns vegnan supplitgads d'indemnisar adequatamain las vischnancas per las consequenzas finanzialas da la reducziun da la taglia sin plaun chantunal. |
Adattaziuns tar la gulivaziun da finanzas |
Tar la calculaziun da la gulivaziun da finanzas vegnan ils gudogns da societads cun status spezial valitads oz main ferm ch'ils ulteriurs gudogns, e quai per tegnair quint da l'imposiziun da taglia pli bassa da questas societads. Questa valitaziun pli bassa croda davent cun l'aboliziun dal status spezial da questas societads. Da nov vegnan ils gudogns da tut las persunas giuridicas valitads main ferm che las ulteriuras entradas. |
Contribuziun cumplementara da durada limitada |
Ils chantuns finanzialmain ils pli debels survegnan durant 7 onns totalmain 180 milliuns francs per onn per mitigiar las consequenzas da las adattaziuns da la gulivaziun da finanzas. |
Mesira
|
Descripziun |
|---|---|
Meds finanzials supplementars per las AVS |
A partir da l'onn 2020 van supplementarmain var 2 milliardas francs per onn a la AVS. Da quels derivan var 800 milliuns francs da la cassa federala: La Confederaziun surlascha a la AVS sia part vi da l'uschenumnà pertschient demografic da la taglia sin la plivalur[1] (530 milliuns francs) ed augmenta sia contribuziun a las expensas da la AVS (300 milliuns francs). Las interpresas e las persunas assicuradas contribueschan 1,2 milliardas francs: Las contribuziuns da la AVS creschan per 0,3 puncts procentuals. Per las lavurantas ed ils lavurants munta quai in augment da las deducziuns da salari da 0,15 puncts procentuals, lur patrunas e patruns contribueschan er 0,15 puncts procentuals. Quai correspunda ad 1.50 francs sin 1000 francs salari. |
Abstimmungsdossier (Deutsch) - Dossier della votazione (italiano)
Ultima midada 30.01.2024
